Човекот секогаш живее во заедница, се раѓа, се обучува, израснува во некое општество. Во општествениот живот тој се вклучува со сите свои дејствувања - со работата, со другарувањето и со другите односи со блиските и ближните, со градењето на семејството, со политичкото поврзување и одлучување, како и со многу други форми на заедничка опстојба. Меѓутоа, самите луѓе треба да имаат вредности, норми и постапки кои се добри за заедничкиот живот и кои придонесуваат за унапредување на заедничкото живеење:
ЗАЕДНИЧКО ЖИВЕЕЊЕ - живот во кој се споделуваат условите, целите, вредностите, работата и остварувањата. Градење добра заедница со луѓето кои се блиски и кои имаат слични цели.
ДОВЕРБА - верба во некого или во нешто, меѓусебно верување, увереност дека меѓу луѓето владеат согласност и чесност. Чувство на пријателство и на сигурност истовремено (една од основните вредности на заедничката опстојба на луѓето - денес се смета дека довербата треба да биде основна вредност меѓу луѓето во идното столетие).
ПОДДРШКА - поткрепа, давање материјална и морална помош. Покровителство за ближниот (потребна им е на луѓето, со тоа тие дознаваат дека
некој мисли на нив, ги сака, им се наоѓа кога треба или им помага во тешкотиите).
ПРИЈАТЕЛСТВО - блискост, наклонетост, еден вид особено почитување меѓу луѓето (длабоко меѓусебно чувство). Поврзаност со емоции, судбини, живеење и со дејност со некого (порано филозофите истакнуваа дека пријателството е најзначајната вредност меѓу луѓето).
БРАТСТВО - особено чувство на почитување на сите луѓе, желба сите луѓе да бидат блиски и покажување дека луѓето имаат капацитети и сили за опфаќање на сите други со едно исто блиско чувство.
СОЛИДАРНОСТ - заедничко мислење, еднодушност, длабока поврзаност на луѓето во мислите, целите и дејствувањето. Заедничко обезбедување на интересите , заемно обврзување и заедничко блиско дејствување за да се реализираат исти цели.
No comments:
Post a Comment